Ако денес сакавте да ја посетите страницата на министерството за правда, немаше да успеете, ја нападна хакер. Но Ивица Ѓорѓиевски не го сторил тоа заради забава, туку во знак на социјален протест.
Во оваа мала соба младиот компјутерџија нема ништо друго освен својот лаптоп. Гладува десет дена. А работа бара веќе три години.
„Мојата реалност е дека навистина така стигнав до овој степен. Последните пари ги потрошив за јогурт“, рече Ивица.
Ивица десет години работел во Италија во информатичкиот сектор. Таму ги стекнал компјутерските вештини. Не успева да добие жителство, па во Македонија се враќа во 2005. Неколку пати менувал работа, но начинот на кој се третирале младите и образовани луѓе во земјата не го задржал никаде долго.
„Јас се жалам себеси и илјадници други како мене, со капацитет, со интелигенција, што систематски се уништуваат, се покоруваат, или умираат вака како мене или бегаат во странство, друг избор немаат. Имаат избор само оние што се поврзани со елитите, со тие што ја имаат моќта, што ги имаат зафатено сите ресурси на општеството“, вели Ивица
Ова е втор пат како го хакира сајтот на министерството за правда. Првиот пат, за да докаже дека странците на македонските институции се лошо заштитени, а со тоа и да укаже и дека на младите и квалитетни кадри не им се дава шанса да сработат подобро.
Од казна не се плаши, иако знае дека го прекршил законот.
„По опасно од смртта нема, така што што би можеле да ми направат? Најмногу што можат е да ме стават во затвор и да ми плаќаат за јадење. Во тој случај би останал жив“; изјави Ивица
Ивица останува во својата мала соба во скопското село Раштак, оставина од неговите родители. Ќе гладува, се додека институциите не покажат грижа.
Вели ова е неговиот принуден штрајк со глад. А за крај, испраќа порака до политичарите во своите кампањи, да почнат да зборуваа за просперитетот на младите Македонци.
„Да обрнат внимание повеќе на образованието, на вложување во информатика, во развој“, рече Ивица.
Извор: http://a1.com.mk/vesti/pecati.asp?VestID=138490
