Склопот е наменски дизајниран за да напојува матрица од 42 паралелно врзани лед-диоди од акумулатор во ситуации кога ќе снема струја и сл., при што треба да има што поголема ефикасност и да влече што помалце струја за да трае акумулаторот што подолго. Поради овие причини веднаш отпадна варијантата со линеарни стабилизатори од типот 78хх кои премногу енергија претвараат во непотребна топлина. На крај се решив за колото LT1375 на Linar Technology и според даташитот дојдов до следната шема:
Се решив за излезен напон од 3V за напојување на лед-диодите иако нивниот максимален работен напон е 3,6V бидејќи вака склопот влече двојно помалку струја од акумулаторот отколку кога излезниот напон би бил 3,6V, а не се приметува разлика во сјајноста - вака при влезни 6V склопот влече 0,5А, при 12V 0,16A и при 24V само 0,07A - два акумулатори врзани сериски би траеле со денови и денови. Струјата на излезот кон лед-диодите е константно 0,43А.
Влезниот напон може да биде од 6-25V, а со промена на вредностите на R1 и R2 може да се добијат различни вредности на излезниот напон, како што е објаснето во даташитот. Вредноста на калемот не е критична, пробав неколку различни и со сите работи добро, само треба да се внимава на дебелината на жицата. Диодата D1 може да е било која шотки за до 1А, кондензаторите се обични керамички, електролитите би требало да се со помал ESR, ама јас ставив обични и сосем малку, скоро неприметно се загреваат. Иначе после неколку часа работа повеќето компоненти се во најлош случај млаки на допир, нема непотребно трошење на акумулаторот на нивно греење.
