Ако може уште една слика од трансформаторот, ама од другата страна, кај што е плочката, и плус ако може да ги фатиш и ножињата кај што се залемени жиците на секундарот од трансформаторот.
Според димензиите ми изгледа како трансформатор изваден од некој видео-рекордер или слично...
Познато ми е оти сум вадел неколку па според напоните на секундарот што ги наведе ми личи на нив.
Е сега, скоро секогаш високиот напон на секундарот тие трансформатори е со тенка жица, најчесто 0.3 милиметри, понекогаш и потенка па не може да се очекува којзнае колкава струја.
Од три такви трансформатори сум направил напојувања, но ги искористував 2х9 в. или 2х12 в. намотките, оти тие беа со подебела жица, околу 1 милиметар. Значи од 2х9 добив (без средниот извод на намотката) 18 волти наизменична, и од 2х12 волти - 24 волти наизменична.
Мислам дека е подобро да се искористи секундарот со 2х9 волти ако е со подебела жица и ќе добиеш регулација од 0 до 20 волти еднонасочна и струја нешто помалку од 2 ампери, оти нема фајде да имаш голем напон за регулација од 50 волти, ако струјата е само 250 милиампери.
Така може да ти се случи да приклучиш некое исправно авто-радио на 12 волти, и кога ќе му ставиш звучници да ти крчи звукот, бидејќи нема доволно струја да му даде на радиото, па ќе си помислиш дека радиото е во дефект.
Ако 20 волти еднонасочна на регулираниот исправувач не ти се доволни, тогаш трансформаторот може да се растури и одново да се премота секундарот но само со подебела жица. Така мислам дека ќе добиеш најмногу 25 волти наизменична.
Сепак, за исправувач со напонска и струјна регулација како тој на шемата погоре е потребен посилен трансформатор што ќе може да даде поголем напон и поголема струја.